മുമ്പും കേരളത്തിന്റെ ടീമുകള്‍ക്ക് മുംബൈയില്‍ കിട്ടിയ ആവേശകരമായി പിന്തുണയ്ക്ക് പിശുക്കുണ്ടായിരുന്നില്ല. 'ഐ' ലീഗിലും റോവേഴ്‌സ് കപ്പിലും കേരളത്തില്‍നിന്ന് ടീമെത്തുമ്പോള്‍ കൂപ്പറേജിലെ ഗാലറി നിറയുമായിരുന്നു. ഐ.എം. വിജയന്റെയും ജോപോള്‍ അഞ്ചേരിയുടേയും കളി കാണാന്‍ കൂട്ടമായാണ് മുംബൈ മലയാളികള്‍ എത്തിയത്. 1991-92ല്‍ കൂപ്പറേജില്‍ കേരളം സന്തോഷ് ട്രോഫി നേടുന്നത് കാണാനെത്തിയതും ആയിരങ്ങളായിരുന്നു. ഗാലറിയുടെ നിറഞ്ഞ പിന്തുണയോടെയാണ് ഗോവയെ എതിരില്ലാത്ത മൂന്നു ഗോളുകള്‍ക്ക് തോല്‍പ്പിച്ച് കേരളം അന്ന് കിരീടമണിഞ്ഞത്. നീണ്ട 22 വര്‍ഷങ്ങള്‍ക്ക് ശേഷമാണ് കേരളത്തിന്റെ മറ്റൊരു സ്വന്തം ടീം മുംബൈയില്‍ വീണ്ടുമൊരു ഫൈനലില്‍ ഏറ്റുമുട്ടുന്നത്. അതാഘോഷിക്കാന്‍ തയ്യാറെടുക്കുകയാണ് മുംബൈയിലെ മലയാളികളടക്കമുള്ള ഫുട്‌ബോള്‍ പ്രേമികള്‍.
കൊല്‍ക്കത്തയ്ക്കും നല്ല ആരാധകര്‍ മുംബൈയിലുണ്ട് എന്നത് കഴിഞ്ഞ മത്സരങ്ങള്‍ തെളിയിച്ചതാണ്. എന്നാല്‍ സച്ചിന്‍ തെണ്ടുല്‍ക്കറുടെ ടീമിനെ വെല്ലാന്‍ സൗരവ് ഗാംഗുലിയുടെ ആരാധകര്‍ക്ക് കഴിയുമോ എന്നതാണ് സംശയം. ഫൈനലില്‍ മുംബൈ ടീം ഇല്ലാത്ത അവസ്ഥയില്‍ മുംബൈ നിവാസികളും തെണ്ടുല്‍ക്കറോടൊപ്പം കേരളത്തിന്റെ കൊമ്പന്മാര്‍ക്ക് കുഴല്‍ വിളിക്കുമെന്നുറപ്പ്.
കേരളത്തിന്റെ കളി കാണാന്‍ തയ്യാറെടുപ്പുകളുമായി മലപ്പുറം, കോഴിക്കോട് ജില്ലകളില്‍ നിന്നും ഫുട്‌ബോള്‍ പ്രേമികളുടെ വലിയ സംഘങ്ങള്‍തന്നെ ഇവിടെയെത്തുന്നുണ്ട്. ഇതൊക്കെ കേരള ടീമിന് അനുകൂല ഘടകങ്ങളാണ്. ഇതവരുടെ കളിയില്‍ പ്രതിഫലിക്കുമെന്ന പ്രതീക്ഷയോടെ തന്നെയാകും കേരളത്തിന്റെ ആരാധകര്‍ എത്തുക.
കൊല്‍ക്കത്ത ടീം വ്യാഴാഴ്ച കാലത്ത്തന്നെ മുംബൈയില്‍ എത്തിയിട്ടുണ്ട്. കേരള ടീം കാലത്ത് കൊച്ചിയിലെ പരിശീലനത്തിനുശേഷം വൈകിട്ടാണ് മുംബൈയിലെത്തിയത്. നാളെ കാലത്ത് കൂപ്പറേജ് ഗ്രൗണ്ടില്‍ അവര്‍ പരിശീലനത്തിനിറങ്ങും.
No comments: